二週間，帶住沙甸去旅行！‧LoBlography Hong Kong Challenge攝影比賽

好野好野，期待已久既12月旅行，卒之黎啦～！
下星期尾就起程。上星期六，立即快快手迎接我既旅行伴侶返屋企……
……佢係邊位？



登登登凳！就係我手上呢部沙甸魚菲林機 — La Sardina啦。（拍拍拍拍）

話說，先生靜雞雞參加左由Lomography Hong Kong舉辦既LoBlography Hong Kong Challenge攝影比賽，響眾多報名Blogger中，有幸被選中為10位參賽者之一。
響兩星期內，可以借走La Sardina番去，任影唔嬲；
期間，要將相片上載到Blog、微博，同Facebook專頁等等……
得到最多回覆既參賽者，就可以得到Lomo LC-A+ 相機勒！

Lomo LC-A+固然吸引，今次Lomo借出既La Sardina，亦係一部相當出色既Snap機。（詳情請瀏覽先生早前參加La Sardina發佈會既文章啦。）
到底，先生可唔可以抽中至愛既藍色沙甸呢？


之前已經響Lomo網站睇過幾位入圍參賽者名單（←強烈推介大家click入去欣賞），
佢地既Blog勁多靚相，水準奇高；
當日終於見到佢地真身，坐我隔離兩位，仲係今屆Form 7考生黎添！
讀書咁忙仲可以keep住影靚相，佩服，佩服啊！


未抽籤，先由Lomography代表Edwin，介紹Lomography歷史與拍攝理念。
有玩開Lomo既朋友，應該聽過佢既「10 Golden Rules」；
先生一向奉行「Don't think, just SHOOT!」主義，今次兩星期愉快旅程，一於好少理，喪影冇命賠。



講完歷史，終於到抽籤時間。
除左第一代限定版4款設計，今次仲有新加入既第二代限定版，
其中黃色千鳥格款式，亦相當吸引喎。


不過講到尾，先生都係鍾情第一代既藍色沙甸罐Fischers Fritze。
明顯先生呢期有運行，抽籤過程絕對公平公開公正，1／10機會，都俾我抽得中愛機，掂呀！


除左相機，每位參賽者仲有4卷免費菲林。
先生抽中3卷100度Slide，同1卷800度黑白菲林……唔駛問，各位攝影發燒友，梗係當日立即開波喪影啦。


「 喂喂？阿May呀？想知先生第1筒slide，影左D乜？」
唔賣關子啦，立即開估－－
先生既全新日本語教室，即將公開任睇！！！！
各位同學，記住mark實先生既部落格、Facebook專頁，仲有新浪微博啦。(￣︶￣)

一白，果然遮三醜‧Dr. White™家用藍光牙齒美白療程

長期唔update，成日呻忙既先生，
有時候，都要偷得浮生，抖下氣既。

今日，先生就同一班blog友，呢埋響酒店房……
……咬住奶咀睇小丸子！？Σ(・ω・ノ)ノ!ｗ

哇，玩Benjamin Button，奇幻逆緣呀？
咳咳，先生手頭上既翻譯，的確係譯完晒（爛）；
重點係，此絕非一般奶咀，而係藍光牙齒美白機。


講起美白牙齒，大家都會諗到去牙醫度做療程，
係就係好白，但係做完牙肉又赤，荷包又赤，
成皮野喎！先生未有咁富貴。

平平地，有乜野好選擇呢？呢盒Dr. White™係可以一試。
成套野，有藍光機、牙齒美白啫喱 x 3支，同埋牙齒膠托 x 2個。只要每日刷牙後，擠入適量啫喱入牙托，戴好再含住藍光機，每日15分鐘，就可以無痛美白牙齒。
原理係咩呢？基本上呢套野類似專業藍光療程，藍光機激活美白GEL既過氧化碳二胺，深入琺琅質以內，於是有效消除煙漬茶漬呀咁，敏感牙齒都用得。
先生成日飲茶飲咖啡，岩晒我用啦，嘿嘿。（￣ー＋￣）


未開始療程，先黎度一度先生D牙有幾黃……
咦咦？C2，勁飲咖啡都有C2咁白，真係還得神落。


跟住，就要將牙托，浸落攝氏80度熱水，令佢稍為變軟，然後幫自己度身訂造牙套。
先生論論盡盡，都係搵專業人士幫手；各位手腳靈活既，自己響屋企處理，綽綽有餘架啦。


當牙托變軟，就放入口腔，用手指輕按成自己既牙型。
萬一整衰左點算？唔怕，再放番入熱水度，牙托就會變回原形，再整過，咪得囉。


整好牙托，跟住就要落美白GEL勒。
記住一支GEL夠用兩次，上下顎夾埋，半支就夠架啦。
仲有GEL剩，仲可以用手指搽落牙漬特別嚴重既部位，去漬都去得特別快。


戴好牙套，按一按藍光機中間既按扭，等15分鐘，就完成美白療程。
連續做6日，棚牙起碼可以白多5、6級架。


好，第一次療程完成，
睇下效果如何先……
哦，由C2跳到去D2，白左2級！
嗯～嗯，確係冇之前咁黃喎，連下顎前排既漬都冇咁明顯，1／10價錢有呢個效果，收晒貨架啦。

咁，連續用左6日既先生，笑容又有幾燦爛先？


結果係，真係足足白左6級！！(*ﾟ▽ﾟ*)
喂喂，影相呢D野，未必咁像真喎……
OK，下次見到我真人，記住叫我E棚牙你睇呀下。

笑得咁開心，除左因為棚牙白左，
仲因為，先生即將放大假，去旅行啦喂。ヽ（●´3｀）ノ

出發之前，除左準備棚靚牙同毛毛帽子，
仲要捉埋個旅行伴侶。
係邊個？下星期話你聽。

【2011夏季東京行】隅田川花火大會，2萬發感動。

2011年8月，東北地震過後5個月。
未出發，首先被問得最多既問題，莫過於係：
「咁快就去東京？怕唔怕輻射架？」
「火車商場冇冷氣喎。30幾度，怕唔怕中暑呀？」
「節電喎！廣告燈熄晒，鋪頭閂晒，仲有乜野好逛呀？」
「食魚生飲日本水，有冇問題架？」

連起飛當日身處機場，響我隔離煲煙既日本大叔都不禁問：
「呢個時候去東京？你唔怕輻射呀？」
我笑住陪佢噴煙：「一個星期遮，死唔去既。」

今趟東京行，魚生係食少左，咁，食湯麵飯糰都一樣遮；
火車冷氣係細左，電風扇一樣強勁播；
鋪頭早關門，咪早D出去逛囉；
廣告牌係熄左好多，換來各大商戶為籌款懸掛既燈籠……
微黃燈光下，唔係更添人情味咩？


今次來東京，又係為《壹週刊》擔任旅遊採訪翻譯。
晏晝機飛羽田，夜晚落機都成9點幾。
好彩落腳民宿附近，仲有麵鋪未關門，立即拿拿臨衝去充飢。
溫泉蛋 ＋ 叉燒另加EXTRA牛油拉麵！又見面啦喂。
咪以為我講既民宿，係一般台灣人開既小公寓喎；
今次住既，係地道到不得了既日本傳統平房！
全靠上 Wimdu 網，先可以訂到呢間響杉並區既優雅小屋。
屋主Shino小姐係室內設計師，家居陳設簡約又不失平民風味，
冇開冷氣仲依然Keep住清爽，日本建築果然巴閉。


好奇問Shino小姐，點解咁大膽可以將自己間屋擺上網任人租。
俾著香港人，邊會搵自己層樓「較飛」呀？
Shino小姐都話，當初都有驚過遇人不淑，所以響網上揀客仔，佢都好小心，一來只租俾女仔，二來一遇上麻煩客人問東問西，多多要求既，一概不租。
「其實一開始我只係希望，可以俾外國人感受日本地道生活。住酒店，始終冇可能有生活感。
不過講到尾，都唔可以顧慮太多；唔肯踏出第一步，就乜都開始唔到。」

哇，唔駛講，即刻感動左啦。

講到杉並區既人情味，仲要數埋呢間麵店。

剩係聽Shino小姐話，呢度既豬肉飯同蕎麥麵勁好食，先過黎試試，

誰不知一踏入門口已經有驚喜！

全店放滿CD電結他，仲有店主親自設計既Band T，以及貼滿招募Band友既揭示板！

店主清宮道心先生日頭打蕎麥麵，夜晚落場就同附近老友記Jam一Jam！

問佢夾開乜野歌（斷估唔會真係咁橋，唱Mr. Children既《KURUMI》呱！？），

估佢唔到，竟然係RADIOHEAD！！

堂堂麵鋪大叔都咁有Heart，我地都要的起心肝，努力練習表演啊。（TˍT

石挽き手打蕎麦　道心
東京都杉並区阿佐谷南1-15-18
定休日：星期一
090-7727-3852


好勒，終於黎到花火大會當日。
前一日全東京忽然落暴雨，行雷閃電到第二朝都未停，
嚇到我地成隊人鼻哥窿都冇肉，仲幾乎打定輸數諗定點執生……
好彩到呢日，天色係就係陰左D，花火大會總算冇Delay，安樂晒。


未開工，先醫肚！
唔好笑我，咁大個女，真係第一次黎夏祭！
除左漫畫入面常見既烤雞串呀、烤魷魚呀，炒麵同蜜餞蘋果呀咁，
原來，仲有好多神奇美食架喎……


呢款北海道牛油烤薯（じゃがバター‧JAGABATA－），其實呢，真係好吸引……
隻隻薯仔大過你拳頭，仲要落足牛油香噴噴！
可惜先生一早食飽烤雞同炒麵，唔係一定一條冷KO佢。


呢款勁夏老威既，係迪士尼都有得食既朱古力包香蕉（チョコバナナ‧CHOKOBANANA）。
神奇既係，原來買一條，可以玩一次抽獎，
一支200YEN分分鐘變3條，4條，甚至5條！
當堂諗起台北既大腸包小腸，有得食，仲有得玩。


夏祭恩物，又點少得刨冰（カキ氷‧KAKIKOORI）呢？
每間刨冰檔都有糖水任斟架，蜜瓜檸檬葡萄草莓益力多乜味都有，
技術好既，斟出一杯彩虹冰冰都仲得。


花火大會7：30開波，我地搞到4：30都未搵到靚位影相。
心諗死梗，誰知又俾我地遇著好心地日本仁兄，
仲同我地有講有笑，輕輕鬆鬆，吹水吹到花火大會開始。

理論上，先生既工作，到呢一刻經已圓滿結束。
倦到唔多識講野既我，個心其實早已飄左番民宿張床度，
心諗：煙花？香港一年放幾次架啦，快D完啦快D完啦。
根本冇期待過欣賞乜野煙花……

誰知，原來當煙花響你頭頂，近距離綻放……



……真係可以好好好好好感動架！

一朵朵花火，猶如宇宙星雲，閃亮，熄滅，再閃亮。
咚咚咚既沉重爆發聲，聽落似太鼓隆隆作響。

相傳自1733年，為超渡餓死亡靈，於是響兩國大川（即係依家既隅田川）舉行水神祭，仲配合煙花表演。呢個，就係隅田川花火大會既起源。
2011年既今日，隅田川河畔又再發射2萬發煙火，除左為超導東北地震罹難者，更為全日本打氣。睇住身邊所有日本人睇得目瞪口呆，直至2小時煙花匯演終結，河畔90幾萬人，一致鼓掌喝采……
乜野冷氣、節電，早收工……你仲有乜野好介意？

活在當下。一齊欣賞過煙花，夠晒皮啦。